Federico Soriano eta Dolores Palacios arkitektoek sortu zuten eraikina. Etengabe eraikitze lanetan den itsasontzi baten antza eman zioten, eta bere garaian Euskalduna ontziola egondako dike batetik azaleratzen ariko balitz bezala ageri da. Jauregiari Enric Miralles saria eman zioten 2001ean, Espainiako Arkitekturaren VI. Bienalean.
Askotariko jarduerak egiten dira bertan, ekonomia eta enpresa arloetakoak, akademikoak, politikoak, instituzionalak, sozialak nahiz kulturalak. Bertan egiten da, adibidez, OLBEren Opera Denboraldia, Estatuko eta Europako ospetsuenetakoa eta garrantzizkoenetakoa; eta, era berean, bertan du egoitza Bilbao Orkestra Sinfonikoa (BOS) goren mailako musika erakundeak, zeina 1920an sortu baitzen eta 1922an hasi baitzen kontzertuak ematen.
Euskalduna Jauregiari Munduko Biltzar Zentro Onenaren Apex Award saria eman zion Biltzar Jauregien Nazioarteko Elkarteak, zeinak biltzen baititu bost kontinenteetako 57 herrialdeetako Biltzar Jauregiak.
Sari hori emateko, bederatzi atal aintzat hartu eta aztertu zituen Jaworsky irakaslea buru zuen adituen talde batek: eraikina, ekipamendu teknikoa, erakusketa eremua, biltzarren kudeaketa, cateringa, biltzarren azken ebaluazioa, hiria bera, zentroaren kokalekua eta hotelak.
